index introductio imagines || partitura exemplar translatio

bibliographia e-mail

CTH 413.1

Exemplar --

Citatio: S. Görke (ed.), hethiter.net/: CTH 413.1 (Expl. --, 04.06.2012)

§1

1 -- [GIM]-an É [DINGIR-LI]M! G[IBI]L našma ÉMEŠ GIBILMEŠ dammeli pedi wedanzi

2 -- [n]=ašta maḫḫan šamanuš išḫūwanzi

3 -- nu šamanaš kattan kiššan tianzi

4 -- 1 MA.NA URUDU dannanuwanza 4 GIŠGAG ZABAR 1 GIŠNÍG.GUL AN.BAR TUR

5 -- nu ištarna pedi GIŠkurakkiyaš pedi daganzip[a]n paddai

6 -- nu=kan URUDU anda dāi

7 -- namma=n IŠTU GIŠGAGḪI.A araḫzanda tarmaizzi

8 -- nu EGIR-anda IŠTU GIŠNÍG.GUL AN.BAR walaḫzi

9 -- n=ašta anda kiššan memai

§2

10 -- kāš=wa maḫḫan URUDU paḫḫašnuwanza namma=war=aš ukturiš

11 -- kē=ya=wa É DINGIR-LIM QĀTAMMA paḫḫašnuwanda ēšdu

12 -- nu=war=at=šan dankuwai takni šer uktūri ēšdu

§3

13 -- EN SÍSKUR=ya=kan ŠUM-an ḫalzāi

14 -- kē=ya=wa É DINGIR-LIM kuiš wetet

15 -- nu=war=aš DINGIRMEŠ-aš peran QĀTAMMA uktūriš ešdu

16 -- nu=wa=za=kan kē É DINGIR-LIM DINGIRMEŠ-aš peran TI-anni aššuli INA EGIR U4-MI ḫaššikdu

§4

17 -- nu=wa=ššan ŠA ÉMEŠ maḫḫan 4 ḫalḫaltumarīēš daganzipi šer ukturīēš

18 -- nu=war=at=kan UL weḫandari

19 -- ŠA EN SISKUR=ya=wa=kan aššul PĀNI DINGIRMEŠ INA EGIR U4-MI QĀTAMMA lē wēḫzi

20 -- nu=wa=za=kan kī É DINGIR-LIM PĀNI DINGIR-LIM aššuli DINGIR-LAM AŠŠUM BĒLUTTIM KUR URUḪATTI GIŠŠÚ.A LUGAL-UTTI=ya TI-anni ḫattulanni innarauwanni ḫaššikdu

§5

21 -- 4 ḫalḫaltummariyaš=ma kuedaniya ANA 1 ḫalḫaltumari kattan kiššan dāi

22 -- 1 šamanaš KÙ.BABBAR 1 šamanaš GUŠKIN 1 šamanaš NA₄ZA.GÌN 1 šamanaš NA₄DUḪ.ŠÚ.A 1 šamanaš NA₄AŠ.NU11.GAL 1 šamanaš AN.BAR 1 šamanaš URUDU 1 šamanaš ZABAR 1 šamanaš NA₄kunkunuzziyaš

23 -- n=at=kan 4 ḫalḫaltummarīēš QĀTAMMA ḫandanteš

§6

24 -- ANA 4 kurakkiyašš=a kuedaniya ANA 1 kurakki kattan kiššan dāi

25 -- 1 kurakkin KÙ.BABBAR 1 kurakkin GUŠKIN 1 kurakkin NA₄ZA.GÌN 1 kurakkin NA₄DUḪ.ŠÚ.A 1 kurakkin AN.BAR 1 kurakkin NA₄kunkunuzziyaš 1 kurakkin URUDU 1 kurakkin ZABAR dāi

26 -- nu=kan anda kiššan memai

§7

27 -- kāša kē kue É DINGIR-LIM tuk ANA DINGIR-LIM wetummen

28 -- DINGIR-LIM=ya=kan ŠUM=ŠU ḫalzāi

29 -- wedanzi=ya=at kuedani

30 -- nu=war=at UL anzāš wetummen

31 -- DINGIRMEŠ=war=at ḫūmanteš weter

§8

32 -- DINGIRMEŠ LÚMEŠ=war=at LÚNAGAR-az weter

33 -- šamanuš=ma=wa kattan DTelipinuš daiš

34 -- šer=ma=ššan kudduš DÉ.A-aš ḫaddannaš LUGAL-uš wetet

35 -- GIŠ-ru=ma NA4=ya ḫumanteš ḪUR.SAGMEŠ uter

36 -- pūrut=ma DINGIRMEŠ MUNUSMEŠ u[ter]

§9

37 -- šamanuš kattan ŠA KÙ.BABBAR GUŠKIN=ya dāir

38 -- GUŠKIN URUPirundummeyaz uter

39 -- KÙ.BABBAR Kuzzaz uter

40 -- NA₄ZA.GÌN ḪUR.SAGTakniyaraz uter

41 -- NA₄AŠ.NU11.GAL KUR URUKanišḫaz uter

42 -- NA₄DUḪ.ŠÚ.A KUR URUIlamdaz uter

43 -- NA₄kunkunuzzin daganzipaz uter

44 -- AN.BAR GE6 nepišaš nepišaz uter

45 -- URUDU ZABAR URUAlašiyaz ḪUR.SAGTaggataz uter

§10

46 -- nu kāša šamanaš kattan šamananni GUŠKIN dāir

47 -- nu GUŠKIN maḫḫan uktūri namma=t parkui daššu=ya

48 -- n=at=šan DINGIRMEŠ-aš NÍ.TE-aš uktūri

49 -- n=at=kan DINGIRMEŠ-aš antuḫšašš=a āššu

50 -- kē=ya=kan É DINGIR-LIM ANA DINGIR-LIM uktūri QĀTAMMA āššu ēšdu

§11

51 -- EN SÍSKUR=ya=kan DINGIRMEŠ-aš TI-anni aššuli INA EGIR U4-MI katta ḫašša ḫanzašša QĀTAMMA āššu ēšdu

§12

52 -- 9 wallaš KÙ.BABBAR kuišša 1 GÍN KI.LÁ.BI 9 wallaš GUŠKIN kuišša 1 GÍN KI.LÁ.BI 9 wallaš AN.BAR 9 wallaš ZABAR 1 GÍN KI.LÁ.BI

§13

53 -- ZAG.GAR.RA-ni kattan 4 walluš dāi ŠÀ-BA 1-ĒN ŠA GUŠKIN 1-ĒN ŠA KÙ.BABBAR 1-ĒN ŠA AN.BAR 1-ĒN ŠA ZABAR

54 -- ištarniyašš=a ḫantezzi kurakki QĀTAMMA 4 walluš dāi

55 -- menaḫḫanda=ya=šša[n k]urakki tapuwaš ZAG-ni GÙB-li nu kuwapiya QĀTAMMA 4 walluš dāi

§14

56 -- [AN]A 4 ḫalḫaldumariyašš=a QĀTAMMA kuwapiya 1-edani ḫalḫaldummari 4 walluš dāi

§15

57 -- 1 UR.MAḪ GUŠKIN ŠA 1 GÍN 2 TĀPAL GU4ḪI.A AN.BAR IŠTU GIŠŠÙDUN KÙ.BABBAR turiyanteš

58 -- nu kuišša 1 GU4 1 GÍN KI.LÁ.BI

59 -- palzaḫḫaš=ma=šmaš kattan 1-aš

60 -- n=at=šan 2 GU4 palzaḫḫi arandari

61 -- namma=ya=ššan 2 GU4 palzaḫḫi arandari

§16

62 -- palzaḫḫaš=ma gankūwar UL duqqari

63 -- GU4ḪI.A=ya kuēz GIŠŠÙDUN-it tūriyanteš

64 -- nu gankūwar apatt=aya26 UL duqqāri

65 -- n=aš ištarniyaš ḫantezzi kurakki kattan dāi

§17

66 -- ZAG.GAR.RA-ni=ma kattan 1 ZAG.GAR.RA KÙ.BABBAR ŠA 1 GÍN 1 ZAG.GAR.RA GUŠKIN ŠA 1 GÍN 1 ZAG.GAR.RA NA₄ZA.GÌN 1 ZAG.GAR.RA NA₄DUḪ.ŠÚ.A 1 ZAG.GAR.RA AN.BAR 1 ZAG.GAR.RA URUDU 1 ZAG.GAR.RA ZABAR 1 ZAG.GAR.RA NA₄AŠ.NU11.GAL 1 ZAG.GAR.RA NA₄kunkunuziyaš

§18

67 -- ŠAPAL GUNNI 1 GUNNI KÙ.BABBAR ŠA 1 GÍN 1 GUNNI GUŠKIN ŠA 1 GÍN 1 GUNNI NA₄ZA.GÌN 1 GUNNI NA₄DUḪ.ŠÚ.A 1 GUNNI NA₄AŠ.NU11.GAL 1 GUNNI AN.BAR 1 GUNNI ZABAR 1 GUNNI NA₄kunkunuziyaš 4 wallīēš ŠÀ-BA 1-ĒN ŠA KÙ.BABBAR 1-ĒN ŠA GUŠKIN 1-ĒN ŠA AN.BAR 1-ĒN ŠA ZABAR

68 -- nu kuišša 1 wallaš 1 GÍN

69 -- ŠA NA4ḪI.A=ya kuiēš GUNNIMEŠ

70 -- nu kuišša 1 GÍN

§19

71 -- ŠAPAL GIŠIG=ma 1-NŪTUM GIŠIG KÙ.BABBAR ŠA 1 GÍN 1- NŪTUM GIŠIG GUŠKIN ŠA 1 GÍN 1-NŪTUM GIŠIG NA₄ZA.GÌN ŠA 1 GÍN 1-NŪTUM GIŠIG NA₄DUḪ.ŠÚ.A ŠA 1 GÍN 1-NŪTUM GIŠIG AN.BAR ŠA 1 GÍN 1-NŪTUM GIŠIG ZABAR ŠA 1 GÍN 1-NŪTUM GIŠIG NA₄AŠ.NU11.GAL 1-NŪTUM GIŠIG NA₄ŠU.U-aš ŠA 1 GÍN=pat

§20

72 -- 2 KA5.A ŠA URUDU n=aš=kan KÁ.GAL-aš anda dāi

73 -- gankūwar=ma=aš UL kuitki duqqari

§21

74 -- 16 GIŠḪAŠḪUR ŠÀ-BA 4 GIŠḪAŠḪUR ŠA GUŠKIN 4 GIŠḪAŠḪUR ŠA KÙ.BABBAR 4 GIŠḪAŠḪUR ŠA AN.BAR 4 GIŠḪAŠḪUR ŠA ZABAR

75 -- kankuwar=ma=at UL duqqari

§22

76 -- 1 IM.GÍD.DA NU.TIL

77 -- mān šamanaš kattan tianzi